������Ƶ

Mae’r Llwybr Hyfforddiant Proffesiynol: Athro ac Asesydd Arbenigol (Anawsterau Dysgu Penodol/Dyslecsia) wedi’i gynllunio ar gyfer ymarferwyr sy’n gweithio gyda phlant a phobl ifanc sy’n profi anawsterau llythrennedd, gan gynnwys dyslecsia.

Mae’r llwybr yn cyfuno ymchwil gyfredol, dulliau addysgu arbenigol a sgiliau asesu diagnostig. Bydd ymgeiswyr yn datblygu’r wybodaeth a’r arbenigedd ymarferol sydd eu hangen i ddeall ac adnabod anawsterau llythrennedd, darparu cymorth effeithiol ac ymgymryd â gweithgareddau asesu proffesiynol.

Mae’r llwybr yn cynnwys tri chwrs cysylltiedig:

1. Gwyddoniaeth Anawsterau Llythrennedd ar gyfer Ymyrraeth ac Asesu
2. Ymarferydd Addysgu Arbenigol: Addysgu Dysgwyr ag Anawsterau Llythrennedd a Dyslecsia
3. Aseswr Arbenigol: Asesu Dysgwyr ag Anawsterau Llythrennedd a Dyslecsia

Gyda’i gilydd, mae’r cyrsiau hyn yn darparu llwybr dilyniant o ddeall gwyddoniaeth anawsterau llythrennedd, drwy ymarfer addysgu arbenigol, i sgiliau asesu ac adrodd proffesiynol.

Gellir astudio’r cyrsiau’n unigol hefyd, yn dibynnu ar eich profiad a’ch nodau datblygiad proffesiynol.

Gwybodaeth bwysig am statws y llwybr

Mae’r llwybr hwn yn cynnwys tri chwrs datblygiad proffesiynol asesedig, heb gredydau, a gyflwynir gan Ganolfan Dyslecsia Miles Prifysgol ������Ƶ.

Nid yw’r cyrsiau’n cynnig credydau academaidd Prifysgol ������Ƶ ac nid yw cwblhau’r llwybr yn arwain at gymhwyster academaidd gan Brifysgol ������Ƶ.

Gall ymgeiswyr cymwys sy’n cwblhau’r cyrsiau perthnasol yn llwyddiannus wneud cais ar wahân am statws neu achrediad proffesiynol. Ar ôl cwblhau’r llwybr llawn yn llwyddiannus, gall ymgeiswyr cymwys hefyd wneud cais am Dystysgrif Ymarfer Asesu (APC) drwy gorff dyfarnu sydd wedi’i gymeradwyo gan yPwyllgor Safonau Asesu Anawsterau Dysgu Penodol (SpLD Assessment Standards Committee - SASC).

Nid yw statws proffesiynol yn cael ei ddyfarnu’n awtomatig gan Brifysgol ������Ƶ. Bydd gofynion cymhwysedd, aelodaeth, ymgeisio a ffioedd y corff proffesiynol perthnasol yn berthnasol.

Am y llwybr hyfforddiant proffesiynol

Mae’r llwybr hwn yn addas ar gyfer gweithwyr proffesiynol sy’n cefnogi plant a phobl ifanc ag anawsterau llythrennedd, gan gynnwys:

• athrawon
• ymarferwyr Anghenion Dysgu Ychwanegol
• cynorthwywyr addysgu a staff cymorth dysgu
• tiwtoriaid llythrennedd arbenigol
• therapyddion lleferydd ac iaith
• gweithwyr addysg proffesiynol sy’n gweithio gyda dysgwyr sydd â dyslecsia neu anawsterau llythrennedd
• gweithwyr proffesiynol eraill sy’n ymwneud ag asesu, ymyrraeth neu gymorth dysgu.

Mae’r llwybr yn arbennig o addas ar gyfer ymarferwyr sy’n dymuno datblygu arbenigedd a gweithio tuag at achrediad neu statws proffesiynol cydnabyddedig.

Bydd yr union gydnabyddiaeth broffesiynol sydd ar gael yn dibynnu ar gymwysterau a phrofiad presennol yr ymgeisydd a gofynion y corff proffesiynol perthnasol.

Pam astudio’r llwybr hwn?

Mae’r tri chwrs yn darparu llwybr cydlynol o ddeall y gwaith ymchwil a’r ddamcaniaeth sy’n ymwneud ag anawsterau llythrennedd, drwy ymarfer addysgu arbenigol, i sgiliau asesu diagnostig ac adrodd proffesiynol.

Byddwch yn cael cyfle i:

• ddatblygu dealltwriaeth sy’n seiliedig ar dystiolaeth o anawsterau llythrennedd a dyslecsia
• adnabod yr anawsterau y mae dysgwyr yn eu hwynebu wrth ddarllen, sillafu ac ysgrifennu
• cynllunio, cyflwyno a gwerthuso ymyriadau llythrennedd wedi’u targedu
• datblygu sgiliau addysgu amlsynhwyraidd
• datblygu sgiliau asesu diagnostig ac ysgrifennu adroddiadau proffesiynol
• astudio rhannau o’r llwybr drwy gyfrwng y Gymraeg neu’r Saesneg
• gweithio tuag at achrediad neu statws proffesiynol cydnabyddedig, yn amodol ar gymhwysedd a chais ar wahân.
   

Sut caiff y llwybr ei gyflwyno?

Defnyddir dull dysgu cyfunol hyblyg i gyflwyno’r cyrsiau.

Gall ymgeiswyr gael mynediad at:

• sesiynau addysgu byw ar-lein
• deunyddiau dysgu wedi’u recordio
• gweithgareddau dysgu ar-lei
• cymorth a mentora gan diwtoriaid
• sesiynau wyneb yn wyneb ym Mhrifysgol ������Ƶ
• gweithgareddau addysgu ac asesu ymarferol.

Gall rhai ymgeiswyr gwblhau’r cyrsiau’n gyfan gwbl ar-lein. Fodd bynnag, efallai y bydd angen i ymgeiswyr sy’n defnyddio offer asesu Canolfan Dyslecsia Miles fynychu sesiynau wyneb yn wyneb ym Mangor.

Dylai’r rhan fwyaf o ymgeiswyr gynllunio ar gyfer tua 12 awr o astudio annibynnol bob wythnos, yn ogystal â’r sesiynau addysgu a’r gweithgareddau ymarferol.

Gellir cwblhau’r llwybr mewn tua 24 mis fel arfer.
 

Cydnabyddiaeth broffesiynol

Ar ôl cwblhau’r cwrs Ymarferydd Addysgu Arbenigol yn llwyddiannus, gall ymgeiswyr cymwys wneud cais i Gymdeithas Dyslecsia Prydain am Statws Athro Achrededig (ATS) neu Statws Ymarferydd Achrededig (APS).

Mae cwblhau’r tri chwrs yn llwyddiannus yn darparu llwybr hyfforddiant proffesiynol tuag at gydnabyddiaeth fel athro ac asesydd arbenigol ac yn galluogi ymgeiswyr cymwys i wneud cais am Dystysgrif Ymarfer Asesu (APC).

Rhaid gwneud cais ar wahân am achrediad proffesiynol, aelodaeth neu APC drwy’r sefydliad proffesiynol perthnasol. Bydd gofynion cymhwysedd a ffioedd ychwanegol yn berthnasol.

Tîm addysgu

Caiff y llwybr ei gyflwyno gan athrawon ac aseswyr arbenigol profiadol o Ganolfan Dyslecsia Miles.

Mae gwybodaeth lawn am y tiwtoriaid ar gael ar dudalennau’r cyrsiau unigol.

Beth fyddwch chi’n ei astudio ar y cwrs yma?

Mae’r llwybr yn cynnwys tri chwrs sy’n adeiladu ar ei gilydd.

Cwrs 1 Gwyddoniaeth Anawsterau Llythrennedd ar gyfer Ymyrraeth ac Asesu

Mae’r cwrs hwn yn darparu’r sylfaen ddamcaniaethol ar gyfer y llwybr. Bydd ymgeiswyr yn archwilio ymchwil gyfredol, prosesau gwybyddol sy’n gysylltiedig â datblygiad llythrennedd, achosion anawsterau llythrennedd a’r berthynas rhwng asesu ac ymyrraeth.

Bydd ymgeiswyr yn datblygu dealltwriaeth o’r prosesau gwybyddol sy’n gysylltiedig â darllen, ysgrifennu a sillafu. Byddant hefyd yn dysgu sut y gellir defnyddio gwybodaeth asesu i adnabod anghenion cymorth a llywio’r broses o gynllunio ymyriadau.

Gellir astudio’r cwrs hwn cyn neu ar ôl y cwrs Ymarferydd Addysgu Arbenigol. Fodd bynnag, rhaid ei gwblhau cyn dechrau’r cwrs Aseswr Arbenigol.

Gweld cwrs Gwyddoniaeth Anawsterau Llythrennedd ar gyfer Ymyrraeth ac Asesu

Cwrs 2 Ymarferydd Addysgu Arbenigol: Addysgu Dysgwyr ag Anawsterau Llythrennedd a Dyslecsia

Bydd ymgeiswyr yn datblygu sgiliau addysgu arbenigol ac yn ennill profiad ymarferol o gyflwyno ymyriadau llythrennedd wedi’u targedu.

Mae’r cwrs yn canolbwyntio ar gynllunio, cyflwyno a gwerthuso rhaglenni cymorth effeithiol i blant a phobl ifanc. Bydd ymgeiswyr hefyd yn datblygu eu harbenigedd mewn dulliau addysgu amlsynhwyraidd ac ymarfer sy’n seiliedig ar dystiolaeth.

Ar ôl cwblhau’r cwrs hwn yn llwyddiannus, gall ymgeiswyr cymwys wneud cais am statws proffesiynol perthnasol. Nid yw’r statws yn cael ei ddyfarnu’n awtomatig gan Brifysgol ������Ƶ.

Gellir astudio’r cwrs hwn cyn neu ar ôl y cwrs Gwyddoniaeth Anawsterau Llythrennedd.

Gweld y cwrs Ymarferydd Addysgu Arbenigol

Cwrs 3 Aseswr Arbenigol: Asesu Dysgwyr ag Anawsterau Llythrennedd a Dyslecsia

Mae’r cwrs hwn yn datblygu sgiliau asesu arbenigol, gan gynnwys sgrinio, asesu llythrennedd, profion seicometrig, asesu diagnostig ac ysgrifennu adroddiadau proffesiynol.

Bydd ymgeiswyr yn dysgu sut i weinyddu a dehongli asesiadau ac adrodd ar y canlyniadau. Byddant hefyd yn datblygu’r sgiliau sydd eu hangen i wneud argymhellion gwybodus sy’n cefnogi cyflawniad a chyfranogiad dysgwyr.

Rhaid bod ymgeiswyr wedi cwblhau’r cwrs Gwyddoniaeth Anawsterau Llythrennedd ac wedi cwblhau, neu bron â chwblhau, y cwrs Ymarferydd Addysgu Arbenigol cyn dechrau’r cwrs hwn.

Gweld y cwrs Aseswr Arbenigol

Ar gyfer blwyddyn academaidd 2026/27, y gost fydd £4,750 pan yn archebu'r tri cwrs gyda’i gilydd.

Mae hyn yn cynnig gostyngiad o’i gymharu ag archebu’r tri chwrs ar wahân. Gellir talu ffi’r llwybr llawn mewn tri rhandaliad dros chwe mis, cysylltwch gyda aelod o'r tim i drafod ymhellach.

Dylai ymgeiswyr:

• fod yn hyderus eu bod yn gallu astudio ar Lefel 7
• meddu ar brofiad proffesiynol perthnasol ym maes addysg, cymorth dysgu, therapi neu faes cysylltiedig
• meddu ar sgiliau darllen, ysgrifennu a chyfathrebu cryf
• bod ag o leiaf ddwy flynedd o brofiad o weithio gyda phlant a phobl ifanc mewn amgylchedd addysgol neu therapiwtig.

Mae’r cwrs Ymarferydd Addysgu Arbenigol yn gofyn i ymgeiswyr gael mynediad at blentyn neu berson ifanc rhwng 6 ac 16 oed a fyddai’n elwa ar ymyrraeth llythrennedd yn eu gweithle neu mewn sefydliad cysylltiedig.

Cyn dechrau’r cwrs Aseswr Arbenigol, rhaid i ymgeiswyr fod wedi cwblhau’r cwrs Gwyddoniaeth Anawsterau Llythrennedd ac wedi cwblhau, neu fod bron â chwblhau, y cwrs Ymarferydd Addysgu Arbenigol.

Gellir ystyried astudiaeth gyfatebol a gwblhawyd gyda darparwr arall. Cysylltwch â Chanolfan Dyslecsia Miles os nad ydych yn siŵr a yw eich cymwysterau neu’ch profiad yn bodloni’r gofynion.

I wneud cais am y Llwybr Hyfforddiant Proffesiynol Athro ac Asesydd Arbenigol, cwblhewch y ffurflen gais isod.

Gwneud cais am y llwybr proffesiynol llawn

Gwneud cais am gwrs unigol

Gallwch hefyd wneud cais am bob cwrs ar wahân drwy ddefnyddio’r wybodaeth ymgeisio ar dudalennau’r cyrsiau unigol.

Trafod eich opsiynau

I drafod eich addasrwydd ar gyfer y llwybr, eich nodau achredu proffesiynol neu’r man cychwyn mwyaf addas, cwblhewch y ffurflen cysylltu neu cysylltwch â Chanolfan Dyslecsia Miles:

E-bost: mdc-training@bangor.ac.uk

Mae gwneud cais am gwrs datblygiad proffesiynol Prifysgol ������Ƶ yn broses ar wahân i wneud cais am achrediad, aelodaeth neu Dystysgrif Ymarfer Asesu gan sefydliad proffesiynol allanol.